مراحل صنع اللقاح. للدكتورة هند الناقولا/المانيا


1 قراءة دقيقة

 راح احكي ببوست و شرح مبسط كتير و راح حاول ما استخدم مصطلحات طبية ليكون الشرح أسهل للفهم عن كيفية تطوير لقاح جديد يعني شو المراحل اللي بمر فيها أي لقاح جديد ليتصرح عنه و ينزل ع الأسواق . أول شي شو هنن الأهداف من تطوير أي لقاح ؟ ١. الأمان : يعني منحاول قدر المستطاع يكون اللقاح بأقل آثار جانبية و آمن ع الجسم ٢. الفاعلية : ليمنع المرض اللي بكون بالعاده إما خفيف او متوسط الشده أو شديد جدا أو ليمنع الانتان لان كتير مرضى ممكن يكون عندهم الڤيروس لكن ما عندهم أعراض أبدًا. ثاني شي : مراحل تطوير اللقاح كلنا سمعنا قبل كام شهر انه لقاح كورونا صار بالمرحله الثانية أو الثالثة . فشو هنن المراحل اللي بمر فيهن أي لقاح أولا المرحله ما قبل السريرية: و بهاي المرحلة منطبق اللقاح على حيوانات المخبر و منراقب أولا الآثار الجانبية اللي ممكن تنتج عن اللقاح. و ثانيا مندرس الفاعلية و ثالثا منعطي الڤيروس لهالحيوانات اللي عطيناها بالمرحلة السابقة اللقاح و منشوف اذا بيظهر عندها المرض أو لا ثانيا المرحلة السريرية : اللي بدورها بتنقسم لتلات مراحل المرحلة الأولى او  (phaseI): بهالمرحلة منعطي اللقاح لأشخاص متبرعين أصحاء ( يعني ما عندهم أمراض ) و العدد بكون صغير يعني عينه صغيره منقول ١٠٠ متبرع. و بعدها مندرس الآثار الجانبية ، و مندرس الجرعة القصوى اللي ظهرت معها الآثار الجانبيه و الجرعة الدنيا اللي ظهرت معها الأضداد بالجسم. المرحلة الثانية أو (phase II)   : بهالمرحلة منعطي اللقاح لعدد أكبر من المتبرعين لنقول ١٠٠٠ شخص و طبعا العينه بهالمرحلة من كل فئات الناس يعني أصحاء ، مرضى ، ذكور ، اناث ...و غيره بعدها منراقب الآثار الجانبية و مندرس الفاعليه و الجرعة المرحلة الثالثة أو (Phase III): و بهالمرحلة منعطي اللقاح متل المرحلة الثانية لكل فئات الناس يعني مختلف الاعمار و الجنس و مرضى و أصحاء و لكن لعدد أكبر بكتير تقريبا ١٠٠٠٠ و بلقاح كورونا كانت العينه ٦٠ الف متبرع و بعدها منعمل دراسة لتأثير اللقاح ع المتبرعين و ما ننسى منعمل فحص ال PCR لهالمتبرعين و منشوف مين صار ايجابي بعد اعطاء اللقاح . بعد كل هالمراحل بيجي دور FDA لتوافق على اللقاح تحت اعتبارات الفاعلية و الآثار الجانبية و عدم الامراضية و غيرها من الأمور و الشروط و من بعدها بيتصرح عن اللقاح و بينزل بمرحلة الاستخدام الطارىء و السريع مثل بحالات الأوبئة اللي منها الكورونا . بتمنى يكون الشرح مُبَسط و سهل و كون عطيت فكرة عن اللي عم نسمعه بالفتره الأخيره . كونوا بخير

تعليقات
* لن يتم نشر هذا البريد الإلكتروني على الموقع.